Një ditë pas tragjedisë së ndodhur në liqenin e Shkodrës, është arrestuar prifti i Manastirit të Vranjës, Goran Kimpanov.
Ai akuzohet për vepër penale lidhur me mungesën e sigurisë dhe brenda një afati çështja do të dërgohet në Prokurorinë e Podgoricës, bën me dije media “Kurir”.
Personat e shpëtuar thanë se, i ishin lutur priftit që t’i nxirrte në breg, pasi disa prej tyre duhet të ishin në punë pasdite, ndërkohë që ky i fundit u mor në pyetje për rreth 20 orë në Qendrën e Sigurisë të Podgoricës.
Kujtojmë se nga përmbysja e varkës që po kthehej nga Manastiri i Vranjës, u shua një familje me tre pjesëtarë, si dhe miku i tyre që tentoi t’i shpëtonte, Darko Vujoseviç.
Gruaja Jana Kumboroviç mësohet se, ishte 4-muajshe shtatzënë, ndërsa nuk arritën të shpëtonin as bashkëshorti i saj Ratko dhe vajza 12-vjeçare.
Sipas mediave, të nëntë personat që ndodheshin në varkë ishin besimtarë të rregullt dhe e përshkonin këtë udhëtim çdo të diel. Ndërkohë vijojnë kërkimet për trupin e nënës dhe të bijës, ndërsa tashmë është nxjerrë nga liqeni vetëm ai i kryefamiljarit.
