Pasditen e sotme menjëherë pas ngjarjes së rëndë në Himarë ku një vajzë 7-vjeçe u përplas për vdekje nga një skaf teksa ishte duke luajtur dhe notuar në breg të detit, deputetja e Partisë Demokratike Merita Bakiu, njëherazi dhe kryetare e Aleancës së Grave Deputete, ka reaguar duke dënuar në emër të grupit parlamentar të PD-së mungesën e sigurisë në bregdetin shqiptar.
Ajo shkruan gjithashtu se fakti që mjeti lundrues drejtohej nga një oficer i lartë policie është dëshmi e profilit të ulët të efektivëve që janë në poste drejtuese në Policinë e Shtetit.
“Grupi Parlamentar i Partisë Demokratike, dënon ashpër mungesën e sigurisë në bregdetin shqiptar.
Ngjarja që ndodhi sot në Potam, ku një fëmijë 5 vjeçar humbi jetën si pasojë e përplasjes nga një skaf që drejtohej nga një oficer i lartë policie është tragjike dhe dëshmi e plotë e profilit të ulët të efektivave të Policisë së Shtetit, që në vend të mbrojnë qytetarët i vrasin ata.
Grupi Parlamentar i Partisë Demokratike dhe anëtarët e Komisionit të Medias shprehin ngushëllimet për engjëllin e vogël dhe insistojnë në pastrimin e Policisë së Shtetit nga oficerë që vetëm me figurën e ruajtësit të ligjit nuk kanë asgjë të përbashkët”, shkruan Bakiu.
Në lidhje me ngjarjen e rëndë ka reaguar dhe deputeti i PD-së Arbi Agalliu, i cili e cilëson oficerin e policisë Arjan Tase si një vrasës.
POSTIMI I PLOTË
VRASËS
“Nëna 154” është emri i skafit që mori jetën e vajzës 5 vjeçare, prindërit e së cilës kishin zgjedhur Himarën për të pushuar këto ditë gushti.
“Nëna 154” një skaf me dy motorë nga 300 kuaj fuqi secili, i denjë për të kaluar Adriatikun pa asnjë problem, i mori jetën sot të vogëlushes 5 vjeçare e cila ndodhej në breg duke luajtur.
Ky mjet, i cili mund të quhet vrasës nëse qarkullon pranë bregut jashtë kushteve teknike, po drejtohej nga një punonjës i policisë së shtetit i akuzuar për shpërdorim detyre dhe mbjellje të lëndëve narkotike. Ky punonjës i policisë, i cili duhej të kujdesej në fakt për jetën e 5 vjeçares, sot u bë vrasësi i saj.
Asnjë korridor për lundrim të mjeteve në plazhin e Potamit. Asnjë masë e marrë.
Jeta këtu nuk ka më asnjë vlerë e për më tepër kur ta merr një polic i akuzuar për trafiqe.
