Një ngjarje e rëndë ka tronditur qytetin Brest në Francë, ku të enjten një çift shqiptar u gjet i pajetë në apartamentin e tyre. Mediat franceze raportojnë se rreth orës 16:30 një banor i lagjes Europe telefonoi policinë, duke deklaruar se kishte dëgjuar dy të shtëna arme në adresën 101 Rue Général Paulet.
Forcat e rendit mbërritën menjëherë në vendngjarje dhe gjetën trupat e Andon Janaqit, 36 vjeç, dhe partneres së tij, Anjeza Zeneli, 30 vjeçe. Pranë viktimave u gjet edhe një armë gjahu. Sipas të dhënave paraprake, dyshohet se gruaja është vrarë e para dhe më pas autori i dyshuar ka kryer vetëvrasje. Hetuesit po e trajtojnë ngjarjen si vrasje të ndjekur nga vetëvrasja.
Çifti ishte prindër i dy fëmijëve. Në momentin e ngjarjes, njëri prej tyre nuk ishte kthyer ende në banesë, ndërsa fëmija më i vogël ndodhej në shkollë. Autoritetet franceze po vijojnë hetimet për të zbardhur motivet që çuan në këtë akt ekstrem që ka tronditur komunitetin.
Ka reaguar për Euronews Albania edhe nëna e viktimës Andon Janaqi. Floresha Janaqi foli nga Korça dhe rrëfeu momentet pasi mori lajmin për vdekjen e të birit dhe partneres së tij.
“Flisja vazhdimisht me djalin dhe i thosha t’i rregullonin gjërat. Ata ziheshin shpesh. Ai kishte shumë dashuri për të, deri në marrëzi. Kishte rreth katër vjet në Francë. Nuk e di pse janë zënë, sepse ekonomikisht nuk kishin probleme.” u shpreh ajo.
Nëna e të ndjerit u bëri thirrje autoriteteve shqiptare të ndihmojnë për sjelljen e trupit të djalit në atdhe. “Kam edhe vajzën të sëmurë. I lutem shtetit të më ndihmojë për kthimin e trupit të djalit. Edhe familjes së vajzës i kërkoj falje. Më thanë të mos i marr, se nuk kam fytyrë t’u flas.” tha ajo.
Ngjarja ka ndodhur në të njëjtin orar që raportuan fillimisht mediat franceze, kur banori i lagjes njoftoi policinë për të shtënat. Pasi mbërritën në banesë, forcat e rendit konstatuan trupat e çiftit si dhe pushkën e gjahut që dyshohet të jetë arma e përdorur. Hetimet po vazhdojnë.
