Një ngjarje e rëndë u regjistrua ditën e djeshme në Ostren të Bulqizës.
Rajmonda Tola së bashku me vajzën 18 vjeçe Rudinën dhe djalin 14 vjeç Fatjonin, u gjetën pa shenja jete.
Vajza tjetër ndërkohë u dërgua me urgjencë në spital.
Fillimisht në media u raportua, se vdekja e tyre kishte ardhur për shkak të hemimit nga gazi.
Daja i fëmijëve u shpreh për “Balkanweb” se helmimi nuk ka ardhur nga gazi, por dyshon te ushqimi, pasi bombolën e ka gjetur në oborr.
“Nuk ka qenë nga gazi, as mangalli dhe as nga ngrohja elektrike. Një bombol 5 litërshe ka qenë jashtë banese kur kemi shkuar. Nuk ka qenë rrjedhje gazi. Kanë ndërruar jetë rreth orës 22:00-23:00 të së enjtes dhe kemi gjetur supë në një pjatë dhe e kemi dërguar për t’i bërë analizat”, deklaroi ai.
Daja shton, se pret hetimin e policisë, ndërsa trupat janë dërguar për analizë në spital.
“Unë kam këmbëngulur si dajë, i kam dërguar nga spitali i Bulqizës në të Dibrës dhe kërkoj të bëhen analizat në mënyrë të hollësishme. Hedhim poshtë deklaratat e deritanishme për rrjedhje e gazi e çfarë ka dalë”, shprehet ai.
Familja Tolaj jetonte në kushte të vështria ekonomike.
Rajmonda qëndronte në shtëpi me 3 fëmijët, ndërsa burri ishte emigrant në Greqi.
