BEJRUT
Kryeministri i Libanit, Hasan Diab ka njoftuar të hënën dorëheqjen e qeverisë së tij, pasi një shpërthim në portin e Bejrutit shkaktoi së paku 158 të vrarë dhe më shumë se 6000 mijë të lënduar.
Diab e ka bërë publik dorëheqjen nga posti në një fjalim të drejtpërdrejtë në televizion, ku njoftoi se nuk do të jetë më në postin e kryeministrit të Libanit. Diab ka thënë se krimi ishte rezultat i korrupsionit endemik, ndërsa ka bërë thirrje që përgjegjësit për ngjarjen të mbajnë përgjegjësi.
Diab madje theksoi se korrupsioni në Liban ishte në nivele aq të mëdha sa tejkalonte shtetin. Ai vlerësoi se si kryeministër donte të ndryshonte realitetin, por tha se nuk ia doli dot për shkak të “elitave të korruptuara”.
Ministri i Shëndetësisë në vend Hamad Hassan ka thënë më herët për mediat se qeveria ishte e përgatitur për të dhënë dorëheqjen.
Shpërthimi i 4 gushtit u shkaktua nga një lëndë shpërthyese, e cila kishte 6 vjet që ndodhej në port. Kjo ngjarje ka shkaktuar një valë tjetër proteste në vendin e varfër, që është përballur me problematika të tilla si varfëria, kriza ekonomike e deri te nivelet e rënda të mbijetesës në kohën e pandemisë.
Presioni ndaj qeverisë për të dhënë dorëheqjen ka qenë i madh. Kjo kërkesë nuk shtrohej vetëm nga populli, por edhe nga faktori ndërkombëtar.
Kujtojmë se qytetarët në Bejrut dhe Liban i kërkonin presidentit francez Emanuel Makron që të ndihmojë vendin, pasi populli libanez “drejtohet nga një elitë e korruptuar”.
