Nuk kanë fund tragjeditë për punëtorët në Shqipëri dhe ditën e sotme ka ndodhur e radhës. Një punëtor ka humbur jetën në kantierin e punimeve në aeroportin e Kukësit. Punëtori që ka humbur jetën është 35-vjeçari Meriman Gashi, i cili ndërroi jetë pasi e goditi kova e eskavatorit.
Ndërkohë, pas tragjedisë së rëndë kanë folur edhe familjarët e viktimës. Xhaxhai i tij Abdullah Gashi ka thënë për abc news se nip ii tij kishte vetëm dy ditë që kishte filluar punë në kantier. Ai ka bërë të ditur se 35-vjeçari ishte baba i dy fëmijëve dhe se policia nuk i ka dhënë asnjë informacion për vdekjen.
“Unë erdha te morgu dhe asnjë shpjegim, vetëm kanë lajmëruar ekspertizën nga Tirana, erdhi pas 6 orësh. Ka hyrë një pjesëtar i familjes, duam të zbardhet çështja deri në fund. Djali ishte 35-vjeç, i martuar me dy fëmijë.
Pardje filloi punë dhe sot vdiq. Ishte punëtor i thjeshtë. Policia nuk na ka dhënë asnjë informacion e kemi marrë vesh nga populli vdekjen. Dua zbardhjen e ngjarjes ose do të kërkoj ekspertë privatë”, tha ai.
Punëtorët në Shqipëri janë çdo ditë të rrezikuar në vendin e punës, teksa pas çdo aksidenti faji i mbetet atyre për mosrespektim të masave të sigurisë në punë. Nuk janë asnjëherë kompanitë ku këta punëtorë punojnë, që marrin përgjegjësinë. Inspektoriati i Punës hesht çdo ditë përballë vdekjeve të panumërta dhe kushteve macabre në të cilat punëtorët punojnë. Ditën e djeshme një tjetër tragjedi ndodhi në minierën e Bulqizës ku një minatory humbi jetën pas shembjes së një masivi gurësh. Policia shoqëroi vetëm përgjegjësin e sigurisë në punë, që është i fundit në gjithë procesin. Pronarët dhe administratorët e firmave të mëdha, vazhdojnë të mos mbajnë asnjë përgjegjësi për mungesën e kushteve të punëtorëve dhe vdekjet e tyre.
