Një ngjarje tragjike ka tronditur klubin e Bayern Munich dhe futbollin gjerman. Portieri 36-vjeçar i kampionëve të Gjermanisë, Sven Ulreich, po përballet me një dhimbje të madhe pas humbjes së djalit të tij 6-vjeçar, Len, i cili ndërroi jetë pas një sëmundjeje të rëndë dhe të gjatë.
Lajmi i hidhur u bë publik nga vetë Ulreich dhe bashkëshortja e tij, Lisa (37 vjeç), përmes një postimi prekës në rrjetin social Instagram. “Me trishtim të thellë dëshirojmë të njoftojmë se djali ynë Len ndërroi jetë disa javë më parë pas një sëmundjeje të gjatë dhe të rëndë”, shkruajnë ata, duke ndarë me ndjekësit dhimbjen për humbjen e fëmijës.
Ulreich, i cili ka edhe një vajzë 9-vjeçare me emrin Malia, kishte munguar në mënyrë të vazhdueshme nga aktivitetet e skuadrës që prej tetorit të kaluar, për shkak të përkeqësimit të gjendjes shëndetësore të djalit. Gjatë kësaj periudhe, ai nuk ka qenë pjesë e ndeshjeve jashtë fushe dhe u përfol edhe për mundësinë e tërheqjes nga futbolli.
Megjithatë, pavarësisht dhimbjes së thellë, Ulreich ka vendosur të vazhdojë angazhimin e tij me Bayern Munich. Ai ka rinovuar kontratën edhe për një sezon tjetër, deri në verën e vitit 2026, duke vijuar të jetë në dispozicion të ekipit si portier rezervë pas Manuel Neuer (39 vjeç) dhe talentit të ri Jonas Urbig (21 vjeç).
Në këto momente të vështira, klubi bavarez dhe tifozët e tij kanë shprehur mbështetjen e plotë për familjen Ulreich, duke u solidarizuar me dhimbjen për një humbje të parakohshme dhe thellësisht prekëse.
