Rëndesa psikologjike ka qenë jo pak herë shkak për fatkeqësi të mëdha, por kjo e ndodhur ditën e sotme në Athinë, është tragjedi e rëndë.
Një nënë, Kyriaki Tsortanidou, 42 vjeçe ka hedhur nga kati i pestë vajzën e saj vetëm 4 vjeçe Fotini Spyridaki dhe më pas është vetëflijuar duke u hedhur edhe vet.
Ngjarja mësohet të ketë ndodhur rreth orës 16:30 në Prokopiou Katsantoni Street 10, ku ka pasur edhe shumë dëshmitarë që e kanë parë ngjarjen nga afër.
Banorët janë shprehur se nëna hodhi fillimisht foshnjën, kurse më pas mori një karrige dhe u vetëhodh.
Raportet paraprake flasin për një rëndim psikologjik të gruas. Ajo ishte e martuar dhe burri i saj ishte larguar nga banesa disa minuta përpara se të ndodhte ngjarja e kobshme. Fqinjët thanë se janë të shokuar për atë që kanë parë.
Sipas fqinjëve, gruaja u vetëhodh nga kati i pestë, edhe pse ata i ishin lutur të mos e bënte këtë gjë. Një banor në katin e parë të pallatit përshkroi ngjarjen tronditëse.
Ai u shpreh se nëna dhe vajza ishin mbuluar me gjak dhe nuk kishin asnjë shans shpëtimi. Skena tragjike u pa dhe nga kalimtarë të rastit, kurse menjëherë në vendngjarje erdhi policia dhe ambulancat. Grupi hetimor po punon për të zbardhur totalisht ngjarjen.
Sipas gazetës greke “Zougla”, edhe pse ambulanca ka mbërritur në kohë dhe i ka gjetur me jetë si vajzën ashtu edhe 42-vjeçaren, pasi janë transportuar në spitalet Gennimata dhe Aglaia Kyriakou, ato kanë gjetur vdekjen.
