Një vonesë e vogël, që mund të ishte vetëm bezdisje në një ditë normale, i shpëtoi jetën Bhoomi Chauhan, një studente 28-vjeçare nga Britania e Madhe, e cila kishte ardhur për pushime në qytetin e lindjes në Indinë Perëndimore.
Chauhan kishte prenotuar fluturimin AI171 të Air India, që do e kthente në Londër, por nuk arriti të hipte në aeroplan.
Trafiku i dendur në rrugën për në aeroportin e Ahmedabadit bëri që të mbërrinte vetëm dhjetë minuta pasi ishte mbyllur hyrja në bord. Edhe pse kishte bërë check-in online dhe i ishte caktuar vendi 36G, stafi i Air India nuk e lejoi të futej në avion.
“Isha e dëshpëruar. U luta, u thashë që isha pasagjerja e fundit. Por nuk më lanë të hipja,” rrëfen ajo për BBC.
Vetëm pak më vonë, ndërsa përpiqej të merrte rimbursimin e biletës, mori telefonatën që do ta trondiste: avioni ishte rrëzuar vetëm pak çaste pas ngritjes, duke marrë me vete jetën e 241 pasagjerëve dhe 12 anëtarëve të ekuipazhit.
Tetë persona të tjerë humbën jetën në tokë. Në bord ndodheshin shtetas nga India, Britania, Portugalia dhe Kanadaja. Deri tani, autoritetet kanë konfirmuar vetëm një të mbijetuar, britanikun Vishwashkumar Ramesh, i cili ndodhet në spital në gjendje të rëndë.
Bhoomi Chauhan, ndonëse e tronditur nga ajo që ndodhi, ndjen vetëm një ndjesi të thellë mirënjohjeje.
“Nëse do të isha nisur vetëm 10 minuta më herët, nuk do të isha këtu duke e treguar këtë histori. Ishte një mrekulli e pastër.”
Shkaqet e rrëzimit të avionit Boeing 787 Dreamliner mbeten ende nën hetim, ndërsa autoritetet kanë nisur një proces të thelluar për të zbardhur gjithçka ndodhi në ato minuta fatale.
