Detaje të reja janë zbardhur lidhur me operacionin policior të zhvilluar mes Prokurorisë së Tiranës dhe asaj të Kosovës, ku u lëshuan 14 urdhër arreste.
Gjatë këtij operacioni u sekuestruan 64 armë, përfshirë pistoleta, snajperë dhe kallashnikovë.
Për të zbardhur rrjetin e trafikut të armëve, policia shqiptare ka përdorur dëshminë e një të arrestuari në muajin maj, e cila më pas iu dërgua autoriteteve kosovare.
Armët, që fillimisht konsideroheshin armë sportive nga Turqia, modifikoheshin në Ferizaj për t’u përdorur si armë zjarri. Trafikantët përdornin fundjavën për kalimet e kufirit, pasi makinat nuk kontrolloheshin. Armët në Kosovë shkëmbeheshin për para dhe kokainë.
Një nga personat e përfshirë në trafikun e armëve është Euxhenio Manushi, djali i muzikantit Adriano Manushi, i njohur si Ad Sybardhi.
Ai u arrestua më 9 dhjetor në Kamzë, kur udhëtonte në mjetin e drejtuar nga Klaudio Serjani, i cili kishte në posedim 1.5 kg kokainë, me vlerë 270,000 euro. Manushi ishte i interesuar për armë dhe në shkëmbim të tyre ofronte kokainë.
Hetimet kanë treguar se ai dhe disa persona të tjerë udhëtonin drejt Kosovës me lëndë narkotike dhe ktheheshin me armë zjarri.
