Një 24-vjeçar është arrestuar në Tiranë si pjesë e operacionit të koduar “Destinacioni”, që synon goditjen e trafikut të lëndëve narkotike përmes shërbimeve postare.
I riu u kap në flagrancë nga policia në një degë postare, në momentin që po tërhiqte një pako me rreth 3.6 kilogramë kanabis me përqindje të lartë THC.
Dyshohet se lënda narkotike ishte trafikuar nga Shtetet e Bashkuara të Amerikës dhe kishte një vlerë rreth 50 mijë euro.
Operacioni është zhvilluar nga Seksioni për Hetimin e Narkotikëve në bashkëpunim me Forcën e Posaçme Operacionale të DVP Tiranë, Komisariatin e Policisë Rinas dhe Qendrën e Tranzitit të Postës Shqiptare, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Policia ka arrestuar shtetasin F. V., banues në Tiranë, ndërsa hetimet vijojnë për identifikimin dhe ndalimin e personave të tjerë të përfshirë në këtë rrjet trafiku.
Materialet procedurale i janë referuar Prokurorisë për veprime të mëtejshme.
