Gjatë një operacioni policor të koduar “Puzzle”, janë arrestuar 10 persona të dyshuar për trafik armësh dhe droge nga Kosova drejt Shqipërisë, ndërsa dy të tjerë janë shpallur në kërkim.
Operacioni u zhvillua mbi bazën e një hetimi të zgjeruar për një rrjet që dyshohet se furnizonte Tiranën me armë zjarri të trafikuara kryesisht nga Kosova, me qëllim shitjen në tregun ilegal.
Personat e vënë në pranga janë, Emirel Tusha, Leandro Haxhiaj, Fabricio Berberi, Rikardo Hajdaraj, Visar Murati, Kevin Farruku, Geraldo Muraj dhe Adriano Shehu.
Ndërkohë, vijon puna për gjetjen dhe arrestimin e Altin Pajazitit dhe Kadri Prushit, të cilët janë shpallur në kërkim.
Sipas hetimeve, grupi siguronte armët jo vetëm nga Kosova, por edhe nga qytete të tjera brenda territorit shqiptar, për t’i transportuar më pas në Tiranë me qëllim trafikimin dhe shitjen.
Më 1 prill 2025, dy prej anëtarëve të dyshuar, me inicialet A.P. dhe K.P., u kapën në flagrancë me dy armë zjarri, që dyshohet se ishin sjellë nga Kosova për t’u shitur.
Në një tjetër zhvillim të operacionit, gjatë kontrollit në banesën e Kevin Farrukut, policia gjeti dhe sekuestroi 2077 fara kanabisi, duke ngritur dyshime për aktivitet të dyfishtë kriminal, trafik armësh dhe kultivim droge.
Hetimet janë në vijim për dokumentimin e plotë të aktivitetit të kësaj strukture kriminale dhe për kapjen e personave ende të lirë.
