Dy shtetas nga Prizreni janë arrestuar në Kukës gjatë një operacioni të koduar “Kalibri”, të ndërmarrë nga Policia e Shtetit për goditjen e trafikut të armëve nga Kosova drejt Shqipërisë.
Të arrestuarit, Sh. Q., 31 vjeç dhe A. M., 46 vjeç, u kapën në flagrancë në zonën e quajtur “Ura e Hasit”, ku policia gjeti në automjetin e tyre 8 armë zjarri të tipit pistoletë, të cilat dyshohet se kishin hyrë në mënyrë të paligjshme nëpërmjet kufirit jeshil dhe do të përdoreshin për shitje në Shqipëri.
Operacioni u zhvillua nga strukturat e Drejtorisë Vendore të Policisë Kukës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Kukës, pas një hetimi të mbështetur në të dhëna operative.
Sipas hetimeve paraprake, armët ishin trafikuar për t’u shitur dy blerësve të dyshuar, të cilët u larguan nga vendngjarja sapo vunë re praninë e Policisë. Identitetet e tyre nuk bëhen publike për shkak të hetimeve që vijojnë.
Ndërkohë, materialet procedurale i janë referuar prokurorisë për vijimin e ndjekjes penale ndaj të ndaluarve dhe identifikimin e personave të tjerë të përfshirë në këtë aktivitet kriminal.
