Banorët e zonës së Rrjollit janë mbledhur këtë të mërkurë para ambienteve të Prokurorisë së Posaçme, duke vijuar protestën e tyre kundër ndërtimit të resortit turistik të Bashkim Ulajt në këtë zonë të Velipojës. Ata kërkojnë të takohen me prokurorët e SPAK për të shprehur shqetësimet e tyre lidhur me projektin që prek pronat e banorëve të zonës.
Protestuesit deklarojnë se ndërtimi i resortit cenon tokat e tyre dhe se nuk do të heqin dorë nga kundërshtimi i këtij projekti. Me pankarta dhe thirrje kundër ndërtimit, ata theksojnë se janë të vendosur të mbrojnë pronat dhe të drejtat e tyre.
Banorët bëjnë të ditur se protesta e tyre ka nisur prej ditësh në Rrjoll të Velipojës, ndërsa këtë të mërkurë ata vendosën ta zhvendosin para dyerve të SPAK, me qëllim që çështja e tyre të marrë vëmendjen e institucioneve të drejtësisë.
Sipas tyre, kërkesa kryesore është zhvillimi i një takimi me prokurorët e Prokurorisë së Posaçme, për të sqaruar situatën dhe për të kërkuar ndërhyrje lidhur me ndërtimin e resortit turistik në zonë.
