Policia e Tiranës ka vendosur në pranga 4 personat e përfshirë në tjetërsimin e 7500 metra katrorë tokë në zonën e Bërxullës. Në kuadër të operacionit të koduar “Haunting”, Policia ka vendosur në pranga Ymer Markun, Kujtim Balliun, Kujtim Allmetën dhe Agim Llocin. Përveç Allmetës që u kap në Kombinat të Tiranës, të tjerët janë arrestuar në Vorë. Të 4 akuzohen se në bashkëpunim me njëri-tjetrin kanë shpërdoruar detyrën duke falsifikuar dokumentet e një sipërfaqeje toke, në fshatin Bërxullë për t’ja shitur më pas kompanisë “Alko Impex Construction”, në pronësi të Arbër Abazit. Toka dyshohet se është blerë me dokumente të falsifikuara dhe është sekuestruar me urdhër të Prokurorisë së Tiranës.
NJOFTIMI I POLICISË:
Tiranë- Finalizohet nga Sektori për Hetimin e Krimeve Ekonomike dhe Financiare, në bashkëpunim me Sektorin e Forcës së Posaçme të Operacioneve Speciale dhe Kërkimit dhe Komisariatin e Policisë Nr. 7, operacioni policor i koduar “Haunting”. Ekzekutohet masa e sigurisë “Arrest në burg”, për 4 shtetas. Sekuestrohet një sipërfaqe toke 7500 m2, në fshatin Bërxullë, bashkia Vorë. Specialistët e Sektorit për Hetimin e Krimeve Ekonomike dhe Financiare, në bashkëpunim me Sektorin e Forcës së Posaçme të Operacioneve Speciale dhe Kërkimit dhe Komisariatin e Policisë Nr. 7, kanë finalizuar operacionin policor të koduar “Haunting”, për ekzekutimin e masës së sigurisë “Arrest në burg”, të caktuar nga Gjykata e Shkallës së Parë e Juridiksionit të Përgjithshëm Tiranë, për veprat penale “Shpërdorimi i detyrës” dhe “Falsifikimi i dokumenteve”, për shtetasit: Y. M., 55 vjeç, K. B., 65 vjeç, A. L., 53 vjeç, të tre banues në Vorë, dhe K. A., 60 vjeç, banues në Kombinat. Nga verifikimet e kryera ka rezultuar se këta shtetas, në bashkëpunim me njëri-tjetrin, duke shpërdoruar detyrën, kanë falsifikuar dokumentet e një sipërfaqeje toke, në fshatin Bërxullë. Gjithashtu, në kuadër të operacionit, është sekuestruar një sipërfaqe toke 7500 m2, në fshatin Bërxullë, bashkia Vorë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
