Një tjetër aksident ka ndodhur në vend ditën e sotme. Këtë herë në Vlorë, një aksident i pazakontë ka ndodhur ku fatmirësisht pasojat nuk kanë qenë fatale. Drejtuesi i një mjeti ka humbur kontrollin dhe ka përfunduar Brenda një dyqani lulesh.
Ngjarja ka ndodhur në bulevardin “Ismail Qemali”, ku mjeti tip “Ford” ka dalë nga rruga dhe është future thuajse Brenda në dyqan. Shkak i aksidentit dyshohet se ka qenë shpejtësia e lartë e mjetit. Nërkohë, në makinë mësohet se kanë qenë dy persona, shoferi dhe një pasagjer, por nga kontrolli ka rezultuar se ata janë larguar nga automjeti.
Në video duket makina që ka lënë një njollë të gjatë në trotuar para se të përfundonte në derën e dyqanit, ndërsa njerëzit janë mbledhur në afërsi.
Ndërkohë, policia ka mbërritur në vendin e ngjarjes dhe është duke punuar për zbardhjen e rrethanave të aksidentit.
Kujtojmë që javën e fundit ngjarje të rënda kanë ndodhur në vend. Një aksident i rëndë ndodhi në rrugën Fier-Vlorë, ku humbën jetën katër anëtarët e familjes Gushi. Mes tyre ishin dy vajzat e mitura, vetëm 14 dhe 9 vjeçe. Makina e tyre u godit nga pas nga një mjet tip “Audi” që po lëvizte me shpejtësi tej normave duke shkaktuar aksidentin.
