Gjykata e Posaçme ka vendosur të ndryshojë masën e sigurisë për ish-shefin e Komisariatit Rrugor të Tiranës, Roven Zeka, duke e liruar nga paraburgimi dhe vendosur në arrest shtëpie.
Vendimi u mor pas dorëzimit të ekspertizës mjekësore që konfirmon se Zeka ka pësuar dëmtim në zonën e legenit, pas një rrëzimi në qeli.
Për shkak të gjendjes shëndetësore, gjykata vlerësoi se masa më e butë e sigurisë ishte e justifikuar.
Zeka akuzohet nga SPAK për korrupsion, në kuadër të një hetimi që lidhet me manipulimin e procedurave për një aksident rrugor.
Më herët, Gjykata e Apelit të Posaçëm kishte lënë në fuqi arrestin me burg për të dhe për oficerin Edison Tabaku.
Ndërkohë, një tjetër i përfshirë në çështje, shefi i hetimeve të aksidenteve, Sokol Novaku, është lënë më herët në arrest shtëpie, për shkak të rrethanave familjare.
