Testimet në Elbasan për të dyshuarit me koronavirus kanë rezultuar të gjithë negativ.
Pas konstatimit të rasteve të reja të enjten dhe të premten janë kryer 34 testime, ku 3 ishin ritestime.
Në Elbasan u ngrit alarmi për përhapjen e COVID-19, pas zbulimit të rastit skandaloz të restorantit pranë gjykatës, i cili kishte qëndruar hapur gjatë periudhës së epidemisë.
Mësohet se 90% e të prekurve në Elbasan kanë qenë frekuentues të restorantit në fjalë.
Pronari i tij, një 46-vjeçar,u infektua dhe për momentin ndodhet në spitalin “Shefqet Ndroqi”.
Gjithashtu ai ia transmetoi virusin gruas dhe disa klientëve që kishin frekuentuar restorantin.
Kurse ditën e djeshme po në Elbasan u zbulua një lokal, i cili kishte qëndruar hapur fshehurazi, gjatë gjithë periudhës së epidemisë.
Pronari i lokalit së bashku me të gjithë klientët që ndodheshin brenda, u shoqëruan në polici.
Qyteti i Elbasanit ndërkohë numëron 15 raste me COVID-19.
Ndërsa në rang kombëtar, numri i të prekurve ka shkuar në 416, ku në mesin e tyre numërohen 23 viktima dhe 182 të shëruar.
Gjatë dy ditëve të fundit kurba e infeksionit ka shkuar drejt uljes, por kjo nuk do të thotë që tashmë duhet të ulim vigjilencën.
