Prokuroria e Tiranës ka nisur hetimet ndaj Spitalit Amerikan pas një kallzimi të bërë nga Policia e Shtetit, për mashtrimet që subjekti po u bënte qytetarëve shqiptarë me testet për COVID-19.
Lajmin e ka dhënë vetë kryeprokurorja e Tiranës, Elisabeta Imeraj, e cila konfirmoi për “Vizion Plus” se Policia e Shtetit ka bërë një kallzim në Prokurorinë e Tiranës e cila do të hetojë subjektin privat, sipas nenit 267 të Kodit Penal për përhapjen e informatave të rreme që ngjallin panik si dhe bazuar në nenin 174 të Kodit Penal për kontrabandë me mallra të tjera.
Burime për “iconstyle.al” konfirmuan dy ditë më parë se testet në Spitalin Amerikan kanë nisur të bëhen dhe me një çmim abuziv që varion mes 300-400 euro (lexo këtu).
Në një investigim të kryer nga BIRN, ka rezultuar se legjislacioni shqiptar parashikon se në rast epidemie, diagnoza dhe kura për të sëmurët duhet të ofrohet pa diskriminim dhe falas, si nga institucionet publike, ashtu dhe nga ato private.
Zyrtarisht ky test kryhet vetëm nga Instituti i Shëndetit Publik, që ka ekskluzivitetin në Shqipëri për të kryer këtë lloj analize pasi duhet certifikimi nga Organizata Botërore e Shëndetësisë.
Spitali Amerikan në Shqipëri nuk është certifikuar nga OBSH për këtë lloj analize.
Agjencia Kombëtare e Barnave dhe Pajisjeve Mjekësore bëri gjithashtu të ditur se përveç strukturave shtetërore, asnjë subjekt tjetër privat nuk është i certifikuar për të kryer testimin e COVID-19 (lexo këtu).
Vetë drejtori i Spitalit Amerikan, Klodjan Allajbeu zgjodhi të tregohej i painformuar kur tha se nuk ishte në dijeni që ligji kërkonte që testimet të ishin falas.
“Unë nuk e di që ligji të thotë që shërbimi do jetë falas.”-është shprehur Allajbeu, duke shtuar më tej se nuk ishte i sigurt se si do të veprohej në këtë rast, pasi për strategjinë që do ndiqet në vijim pritet ende një vendimmarrje nga qeveria.
“Nëse do kërkohej nga Ministria e Shëndetësisë, Spitali Amerikan do i ofronte testet falas”, vijoi ai.
