Bilanci i viktimave nga tërmeti shkatërrues që goditi Mianmarin më 28 mars vazhdon të rritet dita ditës.
Mediat shtetërore raportojnë se deri tani kanë humbur jetën 3.354 persona, ndërsa 220 të tjerë ende të zhdukur. Mbi 4.850 janë plagosur, ndërkohë që shumë zona vijojnë të jenë të izoluara dhe të parritshme.
Në terren, situata humanitare është alarmante. Organizatat ndërkombëtare të ndihmës kanë paralajmëruar për rrezikun e përhapjes së sëmundjeve infektive, veçanërisht kolerës.
Komisioneri i Lartë i OKB-së për të Drejtat e Njeriut ka akuzuar hapur regjimin ushtarak të Mianmarit për bllokimin e ndihmave humanitare në komunat që nuk e mbështesin qeverinë ushtarake.
Situata përkeqësohet edhe më tej nga konflikti i brendshëm që ka pllakosur vendin që prej grushtit të shtetit në vitin 2021, ku u rrëzua qeveria e zgjedhur e Aung San Suu Kyi.
Lufta civile ka shkaktuar zhvendosjen e më shumë se tre milionë qytetarëve, duke e bërë edhe më të vështirë ofrimin e kujdesit shëndetësor dhe ndihmës së nevojshme.
Sipas OKB-së, një e treta e popullsisë së vendit ka nevojë të menjëhershme për ndihmë humanitare.
Tërmeti me magnitudë 7.7 i shkallës Rihter ka rezultuar ndër më të fortët që ka goditur Mianmarin në 100 vitet e fundit, duke rrënuar spitale, ndërtesa publike dhe duke shkatërruar plotësisht disa komuna të tëra.
Ndërkohë, udhëheqësi i juntës ushtarake, Min Aung Hlaing, është paraqitur në një samit rajonal në Bangkok, gjë që ka shkaktuar reagime të forta dhe protesta në vendet fqinje.
Për të lehtësuar shpërndarjen e ndihmave, junta njoftoi më 2 prill një armëpushim të përkohshëm.
Por sipas OKB-së, vetëm një ditë më pas, më 3 prill, ushtria ka ndërmarrë të paktën 16 sulme ajrore, përfshirë edhe në zona të goditura rëndë nga tërmeti.
