Një tërmet me magnitudë 6.1 të shkallës Rihter është regjistruar sot në detin Mesdhe, rreth 20 kilometra në jug-jugperëndim të ishullit Kasos, pranë lindjes së Kretës.
Lëkundjet ndodhën në një thellësi prej 64.4 kilometrash, sipas të dhënave të Institutit Gjeodinamik të Observatorit Kombëtar të Athinës.
Tërmeti u ndje në disa zona të Greqisë jugore, përfshirë Kretën, ishujt Rodos dhe Kos, si dhe në pjesë të territorit turk.
Si masë paraprake, autoritetet lëshuan një paralajmërim për cunami, edhe pse më vonë nuk u raportuan pasoja të rënda.
Presidenti i Organizatës për Planifikimin dhe Mbrojtjen nga Tërmetet, Efimios Lekas, sqaroi se thellësia relativisht e madhe e tërmetit ka ndihmuar në zbutjen e ndikimit në sipërfaqe.
Sipas tij, tërmete të kësaj natyre dhe në këtë thellësi janë zakonisht të izoluara dhe nuk shoqërohen me pasgoditje të forta.
Lekas theksoi gjithashtu se tërmeti ka ndodhur në të ashtuquajturin “Hark Grek”, zonë e njohur për aktivitet të lartë sizmik për shkak të përplasjes së pllakave tektonike euroaziatike dhe afrikane.
Ai mohoi çdo lidhje të drejtpërdrejtë mes këtij tërmeti dhe lëkundjeve të fundit të regjistruara në Santorini dhe Turqi, duke theksuar se bëhet fjalë për kushte gjeotektonike krejtësisht të ndryshme.
