Detaje të tjera janë bërë me dije rreth tentativës për arratisje që ndodhi ditën e sotme te burgu “313” në Tiranë. Arbër Çekaj dhe Fatmir Pjetri kanë përdorur litarë të improvizuar , teksa kanë shfrytëzuar mungësën e stafit civil të burgut, kur ndodheshin në zonën e ajrimit.
Gazetarja Klodiana Lala ka thënë se dy të burgosurit janë pikasur nga gardianët dhe paraprakisht nuk dyshohet se ka pasur ndihmë nga ndonjë efektiv për Çekajn dhe Pjetrin, megjithëse priten ende hetimet që të zbulojnë më shumë detaje në lidhje me ngjarjen.
“Dy të burgosurit, pra si Arbër Çekaj dhe Fatmir Pjetri, kanë tentuar të arratisen nga burgu me litar të improvizuar. Ato do të përballen me akuzën e tentativës për tu arratisur nga burgu. Arbër Çekaj është arrestuar me 14 vite burg, ndërsa dhe babai i tij është i arrestuar për një kontejner me banane ku u gjetën 49 kg kokainë. Ditën e djeshme ka pasur një debat për babain e tij, që kërkoi masën arrest shtëpie. Një ditë pasi babai i tij u la në burg, ai bëri këtë veprim. Do të ketë një dënim që do të shkojë me 2 vite dënim. E njëjta situatë është dhe për personin tjetër, Fatmir Pjetrin”, ka thënë Klodiana Lala.
