Për të 41-ën herë me radhë, deputetët e Kuvendit të Kosovës pritet të mblidhen sot për të vazhduar përpjekjet për konstituimin e legjislaturës së re, të dalë nga zgjedhjet e 9 shkurtit.
Seanca e kaluar, përfundoi pa sukses, njësoj si të gjitha para saj. Deputetët refuzuan sërish të votojnë për krijimin e komisionit që do të mbikëqyrte votimin e fshehtë për zgjedhjen e kryeparlamentarit.
Sipas rregullave kushtetuese, e drejta për të propozuar kandidatin për kryetar Kuvendi i takon Lëvizjes Vetëvendosje, fitueses së zgjedhjeve. Ky subjekt, i drejtuar nga Albin Kurti, këmbëngul në emrin e Albulena Haxhiut për këtë post.
Por për Partinë Demokratike të Kosovës dhe Aleancën për Ardhmërinë e Kosovës, Haxhiu shihet si figurë përçarëse dhe i kanë kërkuar VV-së të propozojë një emër tjetër.
Në përpjekje për të zhbllokuar situatën, presidentja Vjosa Osmani nisi një raund të ri takimesh me liderët e partive parlamentare.
Takimin e parë e zhvilloi me Albin Kurtin, i cili pas takimit u shpreh se do të bëjë çdo përpjekje për formimin e Kuvendit dhe më pas të qeverisë. Megjithatë, ai nuk dha detaje për hapat konkretë që do të ndërmerren për kapërcimin e krizës aktuale.
Për konstituimin e plotë të Kuvendit, duhet të zgjidhen kryetari dhe pesë nënkryetarët. Vetëm pas kësaj procedure, mund të hidhen hapat drejt formimit të qeverisë së re.
