Presidentja e Maqedonisë së Veriut, Gordana Silanovska-Davkova, ka ushtruar veton e saj të parë që prej marrjes së detyrës, duke refuzuar dekretimin e Ligjit për mbrojtjen e fëmijëve.
Ky ligj parashikonte që licencat për kujdestarët e çerdheve të ishin të disponueshme edhe në gjuhën shqipe, përveç gjuhës maqedonase.
Në një deklaratë për media, Silanovska-Davkova sqaroi se vendimi për veton nuk synon të fyejë ndonjë gjuhë apo të ndjekë interesa partiake, por ka për qëllim të inkurajojë rishikimin e disa dispozitave të ligjit, veçanërisht nenet 9 dhe 10, të cilat parashikojnë përfshirjen e gjuhës shqipe për licencat e kujdestarëve.
Nga ana tjetër, Kryeministri maqedonas Hristijan Mickoski theksoi se dispozitat e kontestuara do të korrigjohen dhe do të rikthehen në Kuvend për miratim të mëtejshëm, duke siguruar se ato do të jenë në përputhje me Kushtetutën dhe Ligjin për Gjuhët.
Ai theksoi gjithashtu se gjuha maqedonase mbetet gjuha zyrtare në të gjithë territorin e shtetit, ndërsa ata që kërkojnë licenca në gjuhën shqipe do të kenë mundësinë ta realizojnë këtë.
