Autoriteti Rrugor Shqiptar ditën e sotme ka shpallur klasifikimin për tenderin 18.5 milionë euro të Unazës së Re. Ky segment përfshin rrethrrotullimin te sheshi “Shqiponja”, ku fitues u projektuan “Vëllezërit Hysa”.
Në tenderin për ndërtimin e nënkalimit që u zhvillua dy javë më parë morën pjesë 8 kompani. Ofertën më e ulët ishte ajo e kompanisë ‘Alb Building’ me 1.72 miliardë lekë ose 14 milionë euro. Më pas u renditën 7 kompani të tjera, ‘Salillari’,’ Vëllezërit Hysa’, ‘2T, Gjoka’, ‘Curri’, ‘Vega’ dhe ‘Gener 2’, ofertat e të cilave kanë variuar nga 14.5 deri në 18 milionë euro.
Më vonë u bë skualifikimi i 5 kompanive. Preteksi ishte se nuk përmbushnin dot kriteret që kishin vendosur. Në garë ngelën vetëm tre, të cilat janë vëllezërit Hysa, Curri, dhe Vega shpk.
Ky është tenderi i tretë për rrethrrotullimin e “Shqiponjës”, por projekti është ndryshuar. Në projektin e parë parashikohej ndërtimi i mbikalimit, i cili u tenderua dy herë.
Kujtojmë këtu se tenderi i parë u fitua nga kompania “Dh Albania” me një vlerë 20 milionë euro. Për këtë kompani “plasi” edhe skandali me falsifikimin e dokumenteve, ku qeveria e detyruar anuloi kontratën.
Në tenderin e dytë kostoja e ndërtimit zbriti deri në 14 milionë euro, por Autoriteti Rrugor i skualifikoi të gjitha ofertat si të pavlefshme.
Në projektin e fundit, nga mbikalim, do të bëhet nënkalim. Sipas Ministrisë kjo do të jetë zgjidhja më e mirë për trafikun.
