Autoritetet kontraktore që në këtë rast janë institucionet publike do të duhet të respektojnë të paktën gjashtë rekomandime të dhëna nga Agjencia e Prokurimit Publik në rastet kur bëjnë modifikime të marrëveshjeve kuadër në kohën që ato janë në fuqi.
Marrëveshjet kuadër janë marrëveshje të lidhura mes dy ose më shumë palëve dhe që rezultojnë nga përfundimi me sukses i një procedure prokurimi dhe në bazë të të cilës në mënyrë të përsëritur realizohet lëvrimi i mallrave e punëve apo shërbimeve për një periudhë të caktuar sipas kushteve të rëna dakord mes palëve në mënyrë paraprake.
Sa i takon rekomandimeve të dhëna nga APP sugjerohet që të respektohen në mënyrë rigoroze rastet se kur mund të bëhet modifikim i tyre, procedura standarde e njoftimit për modifikimin si dhe dokumentimi dhe plotësimi i dosjes respektive.
“Agjencia e Prokurimit Publik (në vijim “APP”), në ushtrim të detyrave të saj sipas parashikimeve në nenin 23, germa “b” dhe “ç”, të Ligjit Nr. 162, datë 23.12.2020 “Për Prokurimin Publik” (në vijim “LPP”), si dhe me qëllim mirëzbatimin e kuadrit ligjor për prokurimin publik, që lidhet me modifikimin e kontratave gjatë kohëzgjatjes së tyre, rekomandon si më poshtë vijon:
- Modifikimi i kontratave apo marrëveshjeve kuadër gjatë kohëzgjatjes së tyre, bëhet vetëm në rastet e parashikuara në nenin 127 të LPP-së kur autoriteti ose enti kontraktor mund të argumentojë se ndodhet në njërin nga rastet e përcaktuara në këtë nen.
- Në rastin kur, modifikimi i kontratës bazohet në pikën 1, shkronjat “b” dhe “c”, të nenit 127, të LPP, autoriteti ose enti kontraktor, pasi ka modifikuar kontratën apo marrëveshjen kuadër, në përputhje me parashikimet ligjore duhet të pasqyrojë modifikimin e bërë në Sistemin e Prokurimit Elektronik, dhe të dërgojë për publikim në Buletinin e Njoftimeve Publike, një njoftim për modifikimin e kontratës/marrëveshjes kuadër gjatë kohëzgjatjes së saj.
- Njoftimi për publikim dërgohet në APP brenda 10(dhjetë) ditëve, nga data në të cilën ka përfunduar modifikimi i kontratës/marrëveshjes kuadër fillestare.
- Njoftimi për modifikimin e kontratës/marrëveshjes kuadër gjatë zbatimit të saj bëhet sipas formularit/ shtojcës me këtë emërtim që gjendet në dokumentet standarde të tenderit.
- Autoriteti ose enti kontraktor duhet të përcaktojë në këtë formular situatën sipas parashikimeve të nenit 127 pika 1, shkronjat “b” dhe “c”, të LPP, duke evidentuar bazën ligjore dhe argumentet përkatëse mbi të cilat është kryer modifikimi.
- Në çdo rast arsyet dhe argumentimet për modifikimin e kontratës ose të marrëveshjes kuadër duhet të dokumentohen nga autoriteti ose enti kontraktor, para kryerjes së modifikimit dhe të bëhen pjesë e dosjes së zbatimit të kontratës”, thuhet në dokumentin e APP.
Marrëveshjet kuadër përdoren nga institucionet në rastet kur ka blerje të përsëritur të mallrave apo shërbimeve, nuk përcaktohet në mënyrë objektive sasia e nevojshme në fazën paraprake, është e pamundur të përcaktohet datë e saktë lëvrimi, çmimet e tregut mund të jenë të paqëndrueshme por jo vetëm./Monitor.al
