Një tender i QSUT është zbardhur “News 24”, ku evidentohet se si është favorizuar kompania fituese.
Tenderi ka vlerën totale 147,8 milion lekë, rreth 1,2 milionë euro, dhe është fituara nga “RO-AL” SHPK me një ofertë sa gjysma e fondit limit.
QSUT ka kërkuar të pajisë zyrat me krevat dopjo si dhe karrige me tapiceri lëkure origjinale natyrale, me shpinore të lartë dhe rezistente ndaj zjarrit.
Ndërkohë, pas këtij lajmi ka reaguar QSUT-ja, sipas të cilës, pajisjet janë për spitalin e ri të sëmundjeve të Brendshme në QSUT dhe jo për mobilimin e zyrave.
Reagimi i plotë QSUT:
Nisur nga shkrimet që qarkullojnë në media për të ashtuquajturat “zyra luksoze të administratës së QSUT”, Qendra Spitalore Universitare “Nënë Tereza” sqaron se:
Nuk ka asnjë procedurë prokurimi për pajisjen e zyrave të administratës së QSUT.
Spitali i Ri i Sëmundjeve të Brendshme në QSUT është në fazën e finalizimit të investimit dhe paralelisht, të mobilimit dhe pajisjeve mjekësore me standarde europiane, për të cilat QSUT ka realizuar procedurat e para.
Të gjitha pajisjet, përfshirë edhe shtretërit per dhomat e pacientëve, mobilimin spitalor dhe pajisjet që nevojitet për të bërë një spital funksional, janë realizuar në përmbushje të kërkesave të shërbimeve universitare të Spitalit të Sëmundjeve të Brendshme në QSUT dhe janë konform standardeve të përcaktuara.
QSUT rithekson se, nuk ka asnjë procedurë për mobilimin e zyrave të QSUT. Çdo përpjekje për të hedhur baltë mbi punën e stafit të QSUT, nuk do të stepë e demotivojë punën e një ekipi që punon çdo ditë me përkushtim e profesionalizëm në shërbim të qytetarëve.
