Kryebashkiaku i Tiranës, Erion Veliaj, në një intervistë për Syri Tv ka folur së fundmi për Teatrin Kombëtar, ku deklaroi se do të ketë një godinë të re.
Sipas Veliajt vendimi i qeverisë është i duhuri dhe pronësia e truallit të Teatrit Kombëtar duhet të ishte e Bashkisë së Tiranës, duke shtuar se kjo e fundit nuk ka para për të ndërtuar teatrin e ri, por do marrë kredi dhe do të vijojë punën.
“Këtu nuk ka asnjë sekret. Ramë dakord që do të marrim një kredi dhe qyteti do të ketë një teatër të ri, siç ka stadiumin e ri, bulevardin e ri, që janë bizhutë e qytetit. Për sa kohë Bashkia e Tiranës do të financojë teatrin e ri, fillimisht duhet t’i kalojë prona që të bëjë investimin. Do ta bëjmë me kredi, jo me buxhetin e shtetit. Nuk i kemi paratë në arkë për këtë projekt. Hip se të vrava, zbrit se të vrara. Keq kur e bën publiku, keq kur e bën privati. Nevoja për një teatër kombëtar është e pashmangshme. Në momentin që nuk ke paratë në buxhet, i merr kredi. Nuk ka asgjë të jashtëzakonshme. Plani a ishte ta bëjmë me paratë e tjetrit, ra. Plani b, do e bëjmë me kredi”, deklaroi Veliaj.
Kujtojmë se prej më shumë se dy vitesh prishja e Teatrit Kombëtar ka përfshirë në një debat qeverinë dhe Aleancën për Mbrojtjen e Teatrit, teksa artistë të shumtë, por jo vetëm, kundërshtojnë vendimin për prishjen e godinës dhe ndërtimin e një projekti të ri.
Në mbledhjen e zhvilluar më 8 maj, Këshilli i Ministrave ka marrë vendimin që truallin e Teatrit Kombëtar ta kalojë në pronësi të Bashkisë Tiranë.
Vendimi është publikuar në Fletoren Zyrtare dhe i jep mundësi Bashkisë që të ndërtojë godinën e re me standarde e kushte bashkohore.
Më tej, shtohet se Bashkisë Tiranë i ndalohet të ndryshojë destinacionin e pasurisë, ta tjetërsojë atë apo t’ua japë në përdorim të tretëve.
LEXO: Pas dy vitesh debat, qeveria merr vendimin për Teatrin Kombëtar
