Të shtënat me armë zjarri kanë tronditur mbrëmjen e sotme zonën pranë digës së Liqenit Artificial në Tiranë. Sipas informacioneve paraprake të Policisë së Shtetit, ngjarja dyshohet të ketë ndodhur pas një konflikti të çastit mes disa personave.
Në njoftimin zyrtar, policia bën me dije se njëri prej të përfshirëve ka qëlluar me armë në ajër, ndërsa deri më tani nuk raportohet për persona të plagosur.
“Forcat e policisë kanë shkuar menjëherë në vendin e ngjarjes për të verifikuar telefonatën e marrë për të shtëna me armë. Paraprakisht dyshohet për një konflikt çasti, ku njëri prej tyre ka qëlluar në ajër. Deri në këtë moment nuk ka informacion për persona të plagosur. Strukturat policore ndodhen në terren dhe po kryejnë verifikimet e nevojshme”, thuhet në njoftimin zyrtar.
Grupi hetimor po punon për të identifikuar personat e përfshirë dhe për të zbardhur rrethanat e plota të ngjarjes.
