Pasi përditësoi të dhënat rreth COVID-19, drejtoresha e ISHP, Albana Fico, iu përgjigj interesit të medias.
Ajo bëri me dije, se tashmë është vënë në përdorim godina e Kavalishencës në Durrës, ku aty tashmë ndodhen 35 persona.
“Janë 35 persona të infektuar nga koronavirusi që aktualisht po marrin shërbim në Kavalishencën e Durrësit“, tha Fico.
Përsa i përket bluzave të bardha, Fico tha se totali i personelit mjekësor i infektuar është 49, nga të cilët 32 janë shëruar dhe vetëm dy ndodhen në spital.
“Në total janë 49 persona, staf mjekësor të prekur nga COVID-19, 32 prej tyre të shëruar dhe vetëm 2 janë të shtruar në spital”, vijoi Fico.
Bilanci i COVID-19 në vendin tonë ka shkuar në 467 të infektuar, nga të cilët 232 të shëruar dhe 23 viktima.
Gjatë 24 orëve të fundit u shënuan 21 raste të reja, ku qyteti më problematik është Shkodra me 13 të prekur.
Në spitalin Infektiv ndodhen 43 persona, 7 në terapi intensive, ku dy janë intubuar.
Ndërsa në spitalin “Shefqet Ndroqi” ndodhen 9 pacientë, 7 prej të cilëve në terapi intensive, ku 5 janë intubuar.
Që nga dita e sotme, orari i lëvizjes është zgjatur deri në 17:30, ndërsa qyetarët do të kenë 90 minuta në dispozicion për të kryer pazaret.
