Në orët e para të 26 dhjetorit, sulme ajrore izraelite në Rripin e Gazës kanë shkaktuar të paktën dhjetë të vrarë dhe dhjetëra të plagosur, sipas mjekëve dhe autoriteteve shëndetësore palestineze.
Një sulm ajror në lagjen Zeitun të Qytetit të Gazës goditi një shtëpi, duke lënë pesë persona të vdekur dhe të paktën 20 të plagosur.
Autoritetet paralajmërojnë se numri i viktimave mund të rritet, pasi shumë persona ndodhen ende nën rrënojat e ndërtesës.
Në një incident të veçantë, pesë gazetarë të kanalit televiziv Al-Quds Al-Youm humbën jetën kur makina e tyre u godit pranë spitalit Al-Avda në Nuseirat, në Gazën qendrore. Makina ishte e shënjuar si automjet medial dhe përdorej për raportime nga zona.
Autoritetet izraelite nuk kanë dhënë ende një reagim lidhur me këto sulme, të cilat ndodhin në një kohë tensionesh të larta.
Izraeli dhe Hamasi kanë shkëmbyer akuza për dështimin e arritjes së një marrëveshjeje armëpushimi, përkundër pretendimeve për përparim në negociata. Mosmarrëveshjet kryesore lidhen me shkëmbimin e pengjeve dhe të të burgosurve palestinezë, si dhe me tërheqjen e trupave izraelite nga Gaza.
Konflikti dhe bilanci i deritanishëm
Hamasi shkaktoi më shumë se 1.200 të vrarë dhe rrëmbeu rreth 250 persona gjatë sulmit të 7 tetorit 2023 në Izrael.
Deri më tani, mbi 100 pengje janë liruar në këmbim të të burgosurve palestinezë, por sipas Izraelit, të paktën dy të tretat e pengjeve të mbetura besohet se janë vrarë ose kanë humbur jetën në robëri.
Ofensiva izraelite hakmarrëse ka shkaktuar mbi 45.000 viktima palestineze, duke sjellë shkatërrime masive në Rripin e Gazës dhe duke përkeqësuar krizën humanitare në këtë zonë të bllokuar.
