Pas një viti në kërkim, policia ka arritur të arrestojë vëllezërit Klement dhe Eldi Çala, të cilët akuzohen për grabitjen e miliona eurove në Rinas.
Mësohet se ata ishin fshehur në një pallat në zonën e bregdetit, në Qerret të Kavajës dhe pasi rrethuan pallatin, forcat e policisë u futën brenda në apartamentin ku ndodheshin të shumëkërkuarit.
Së fundmi, Policia e Shtetit ka publikuar pamjet e megaoperacionit policor të koduar “Të fundit”, ku morën pjesë 300 forca policore, nga Departamenti i Policisë Kriminale, Forca e Posaçme Operacionale në Policinë e Shtetit, Njësia speciale FAST Albania, RENEA dhe Drejtoritë Vendore të Policisë Tiranë, Durrës, Elbasan dhe Komisariat i Policisë Kavajë.
https://www.facebook.com/Policia-e-Shtetit-1502420603377639/videos/211065569976656/
Gjatë megaoperacionit u sekuestruan nga Policia, në cilësinë e provës materiale, armë zjarri, telefona, sasi të mëdha vlerash monetare dhe automjete.
Në momentet e kapjes autorëve iu sekuestruan 3 armë zjarri të llojit pistoletë, 3 automjete tip Audi A 4-6-8, dy motorë BMV 1200 GS, një biçikletë, si dhe një sasi e konsiderueshme vlerash monetare, konkretisht 133.960 euro.
Materialet i kaluan Prokurorisë së Posaçme Kundër Korrupsionit dhe Krimit të Organizuar Tiranë.
Kujtojmë se pasditen e 9 prillit 4 persona të maskuar, pasi çanë rrethimin, u futën brenda aeroportit të Rinasit dhe për 5 minuta ata arritën të grabisnin 4.6 milion euro nga barku i avionit “Austrian Airlines”.
Pas grabitjes, autorët u përleshën me policinë pak km larg Rinasit dhe si pasojë e të shtënave me armë humbi jetën Admir Murataj, i konsideruar si truri i grabitjes.
