Fondacioni gjerman “Friedrich Ebert”, për Edukimin e të Rinjve në Europën Juglindore, ka zhvilluar një anketë në lidhje me emigrimin e të rinjve.
Referuar rezultateve, 285 mijë të rinj shqiptarë duan të largohen nga vendi, shkruan “Monitor”.
Nga këto, 26% duan të largohen drejt Gjermanisë, 18% në Britani, 16% në Itali dhe pjesa e mbetur në vendet e tjera.
Pas rumunëve me 358 mijë, të rinjtë shqiptarë zënë vendin e dytë në Europën Juglindore, e përkthyer kjo në 40%.
Faktorët më të fortë për largimin e të rinjve janë ekonomia dhe perceptimi negativ i situatës në vendin e lindjes.
Nëse në Shqipëri dhe Mal të Zi ky fenomen është shumë i përhapur, në Bullagari dhe Maqedoni, të rinjtë janë të prirur për të mos u larguar nga vendi.
Gjithashtu nga anketa rezulton se të rinjtë nga Europa Juglindore integrohen shpejt me vendin pritës, duke qenë se janë shumë të gatshëm të mësojnë gjuhën e tyre.
Sipas anketës prirje për të emigruar më së shumti kanë të rinjtë që nuk janë të punësuar, që kanë prindërit me nivel të ulët arsimor dhe vijnë nga zonat rurale.
Studimi u ka rekomanduar vendeve të Europës Juglindore, që të përmirësojnë poltikat e punësimit dhe edukimit, të cilat do të çojnë në frenimin e emigrimit.
