Një ditë e ngjeshur kjo e sotmja për drejtësinë shqiptare. Sot priten zhvillime të rëndësishme për dy nga çështjet më të mëdha që tronditën vendin dhe ndërkombëtarët.
Klement Balili dhe Saimitr Tahiri do të përballen me organet ligjzbatuese. Dy çështje të ndara, por edhe të lidhura me njëra-tjetrën.
Balili dhe Tahiri, janë dy emrat që i vendosën Shqipërisë një njollë përpara Brukselit. Tahiri, ministri i Brendshëm i Shqipërisë, akuzohet për trafik droge, përmes kushurijve të tij, vëllezërve Habilaj.
Balili, një biznesmen i fuqishëm, u akuzua nga shteti helen si ‘Eskobari i Ballkanit’, ku sipas tyre furnizonte të gjithë zonën me drogë.
Balili u akuzua në kohën kur Tahiri drejtonte ministrinë e Brendshme, nga këtu u ngrit edhe një hije dyshimi, për një bashkëpunim mes tyre. Por do të jetë Drejtësia, ajo që do të japë vendimin përfundimtar, edhe pse Tahiri e fitoi pafajësinë në Prokurorinë e Katanias.
Çështja Tahiri:
Sot, pritet që të zgjatet sërish hetimi për për ish-ministrin e Brendshëm, Saimir Tahiri.
Edhe pse ishte 17 janari, afati i fundit, Prokuroria e Krimeve të Rënda, do të kërkojë më shumë kohë, kjo për shkak të pritjes së dy letërporosive të reja të dërguara në Itali dhe Malin e Zi.
Referuar Prokurorisë për Krime të Rënda, ish-deputeti i Partisë Socialiste akuzohet për “Trafikim të lëndëve narkotike”, kryer në bashkëpunim, në kuadër të grupit të strukturuar kriminal dhe “Korrupsion pasiv i funksionarëve të lartë”.
Një pikë tjetër ku është mbështetur Prokuroria është edhe lëvizja e lirshme e grupit “Habilaj” në Shqipëri, duke mos u identifikuar as nga radarët. Nga hetimet e deritanishme, këta persona nuk regjistroheshin në asnjë pikë kufitare, pra, kjo, sipas akuzës, të bën të mendosh se ishte diçka e kontrolluar, pasi nuk ndodhte vetëm në një doganë.
Çështja Balili:
Edhe ‘Eskobari i Ballkanit’ do të përballet sot me Prokurorinë e Kriemve të Rënda.
Klement Balili, do të njihet sot me akuzat e ngritura kundër tij si dhe me masën e sigurisë, dhënë në mungesë më shumë se dy vite më parë.
Një ditë më parë, u hodh shorti tek Krimet e Rënda, ku gjyqtare e seancës paraprake u caktua Miliana Muça. Kjo e fundit do të bëjë edhe rivlerësimin e masës së sigurisë.
Hetimet për Balilin u mbyllën dhe paraditen e së martës, prokurori i çështjes Ened Nakuçi dorëzoi dosjen me 4 akuza në Gjykatë me kërkesë për të kaluar çështjen në gjykim dhe marrjen si të pandehur të shumëkërkuarin Klement Balili.
Gjatë seancës që pritet të zhvillohet sot, gjyqtarja Miliana Muça do të marrë në shqyrtim edhe provat e reja të Prokurorisë për këtë çështje, që janë dëshmitë e dy skafistëve që dyshohet se Balili ka kontaktuar si dhe disa përgjime.
