Syri i Kaltër, një nga monumentet më të njohura natyrore të Shqipërisë, po përballet prej kohësh me abuzime të vazhdueshme që cenojnë statusin e tij si zonë e mbrojtur.
Pavarësisht paralajmërimeve të qarta dhe tabelave që ndalojnë hedhjet në ujë, vizitorët, si vendas ashtu edhe të huaj, shpërfillin rregullat duke u hedhur nga lartësi të ndryshme në burimin unik natyror, i cili kërkon ruajtje dhe kujdes të veçantë.
Një operator turistik, i cili çdo ditë shoqëron dhjetëra vizitorë drejt Syrit të Kaltër, ka denoncuar këtë situatën alarmante, duke theksuar se kjo është një shkelje e përditshme që vijon për shkak të mungesës totale të kontrollit institucional.
Sipas tij, turistët e huaj janë më të prirë të shkelin rregullat, shpesh duke injoruar edhe paralajmërimet, dhe kjo sjellje e papërgjegjshme jo vetëm që cenon përvojën e vizitorëve të tjerë, por kontribuon në dëmtimin e përhershëm të një prej thesareve natyrore të Shqipërisë.
Në vend që të mbrohet si një pasuri unike, Syri i Kaltër po shndërrohet në një sfond për video spektakolare në rrjete sociale, ndërsa autoritetet heshtin. Mungesa e rojeve, e kontrollit të përhershëm dhe e një fushate ndërgjegjësuese reale e ka lënë këtë zonë të pambrojtur, duke treguar edhe një herë se tabelat paralajmëruese nuk mjaftojnë për të ruajtur trashëgiminë natyrore.
Ky është një fenomen i përsëritur që ngre pyetjen: A është Shqipëria gati të menaxhojë turizmin natyror me përgjegjësi? Nëse institucionet vazhdojnë të shmangin përgjegjësinë, rrezikojmë që vendet më të bukura të vendit të shkatërrohen nga pakujdesia dhe mungesa e ndërhyrjes shtetërore.
Trashëgimia kulturore dhe natyrore nuk mbrohet me tabela plastike, ajo kërkon prani, vullnet dhe përgjegjësi. Nëse kjo neglizhencë vazhdon, vendet që sot i quajmë “mrekulli”, nesër do të ekzistojnë vetëm në fotografi.
