Sulmi me grusht ndaj kreut të Partisë Demokratike vazhdon të jetë në qendër të vëmendjes, ku së fundmi gazetari investigative Artan Hoxha ngre dyshime të forta.
Hoxha tha në emisionin “Opinion” se fakti që autori Gerti Shehu ka shkuar në protestë pa telefon, të bën të mendosh se sulmi ka qenë i planifikuar. Ai theksoi se një tjetër detaj që e bën të dyshojë është se si doli aq shpejt kartela e autorit.
“E çuditshme që ai nuk kishte telefon dhe kartë identiteti. Ai në momentin që bëri goditjen, reagimi i shoqëruesve të Berishës nuk do të ishte me dhunë, por kapja e tij. Në fillim mu duk e pabesueshme që Berisha mund të goditej, është njeri që nuk mund ta godasësh kollaj. Si doli aq shpejt kartela e tij? Duhet një hetim nga një grup prokurorësh dhe PD vetë të çojë vetë avokat që të bëhet një transparencë e plotë që mos themi mes dy vitesh që kush ia bëri Berishës”, deklaroi gazetari Hoxha.
Si ndodhi ngjarja:
Gerti Shehu, 31-vjeç sulmoi gjatë protestës së të martës kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për t;ju bashkuar protestës.
31-vjeçari goditi me grusht në fytyrë Berishën duke e gjakosur duke iu shpëtuar vëmendjes së truprojave. Më pas Shehu u godit dhe u dhunua nga protestues dhe mbështetës të Berishës.
31-vjeçari u shoqërua nga policia dhe ndërkohë po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor. Në lidhje me ngjarjen e rëndë Berisha u shpreh se gjithçka është e organizuar nga Edi Rama.
