Ditën e sotme i gjithë vendi është tronditur nga sulmi që u bë ndaj televizionit Top Channel, ku mbeti viktimë roja Pal Kola.
Teksa ndodhemi para një atentati, autorët e të cilit ende nuk janë identifikuar, gazetari Klodian Tomorri kritikon rëndë mënyrën se si Bledi Çuçi po drejton ministrinë e Brendshme.
Gjithashtu teksa krimet po marrin përmasa të mëdha çdo ditë e më shumë dhe madje po vriten edhe persona të pafajshëm, sipas Tomorrit kjo tregon se Çuçi e di punën e ministrit të Brendshëm si sport argëtues.
Madje sipas gazetarit në një kohë ku arrihet që të sulmohet me breshëri kallashnikovi një televizion kombëtar, tashmë duket se radha i ka mbetur Ministrisë së Brendshme apo Kryeministrisë.
“Kur krimi këtu ka aq guxim sa të sulmojë ‘Top Channel’, kufiri i radhës ka mbetur Ministria e Brendshme dhe Kryeministria. Kështu si e kanë nisur këta, këtu nuk ka më siguri askush.
Ky Çuçi e di si sport argëtues punën e ministrit të Brendshëm. Dhe këtu ka vajtur puna që çdo javë qeveria dënon nga një ngjarje të rëndë me deklarata”, shkruan Klodian Tomorri.
Vlen të theksojmë se Pal Kola ishte 60 vjeç dhe si roje e godinës së televizionit Top Channel paguhej vetëm 30 mijë lekë (të reja), që tregon realitetin e hidhur të mënyrës se si shfrytëzohen punonjësit në vendin tonë.
