Deputeti i Partisë Demokratike, Saimir Korreshi ka kërkuar që të përjashtohen nga partia urdhëruesit e të dhunës ndaj deputetëve dhe gazetarëve pas mbledhjes së Kryesisë së PD-së zyrtare pak ditë më parë.
Përmes një posti në rrjetin social Facebook Korreshi shprehet se dhuna për shkak të mendimit ndryshe klasifikohet si shkelje e rëndë që sjell përjashtimin nga partia. Këtu deputeti iu referua edhe deklaratave të ish-kreut të PD-së Lulzim Basha si dhe standardit të vendosur nga Këshilli Kombëtar më 15 janar të vitit të kaluar.
“Në 15 Janar 2022 Këshilli Kombëtar i PD vendosi një standard: dhuna për shkak të mendimit ndryshe klasifikohet si shkelje e rëndë që sjell përjashtimin nga partia. Duke iu përgjigjur edhe mendimit të Lulzim Bashës të shprehur të enjten mendoj se ka të drejtë. Standardi duhet ruajtur. Urdhëruesit e dhunës ndaj deputetëve dhe gazetarëve duhet të mbahen përgjegjës!”, deklaron Korreshi.
Bashkë me Korreshin edhe deputetë të tjerë që ishin kundër vendosjes së një date për zgjedhjen e kryetarit të ri të komanduar në PD, kanë dënuar dhunën ndaj tyre atë mbrëmje dhe kanë bërë fajtor ish kreun e PD, Lulzim Basha për atë që ndodhi. Basha i pyetur nga gazetarët në lidhje me këtë deklaroi se distancohet nga dhuna ndaj deputetëve dhe gazetarëve, ndërkohë tha se nuk i ka dëgjuar deklaratat e deputetëve të PD për të.
