Këshilli i Lartë i Prokurorisë ka reaguar ashpër ndaj deklaratave të fundit të bërë nga liderët e partive opozitare, Sali Berisha dhe Ilir Meta, ndaj kreut të SPAK, Altin Dumani.
Nëpërmjet një deklarate, KLP ka theksuar se përpjekjet për të ndikuar ose kërcënuar institucionet e drejtësisë janë sulme ndaj parimeve themelore të integritetit dhe drejtësisë, që janë të domosdoshme për zbatimin e ligjit në Shqipëri.
KLP ka ritheksuar angazhimin e saj për të mbështetur prokurorët e Republikës së Shqipërisë, të cilët punojnë në kushte të vështira, dhe ka dënuar çdo formë presioni ose intimidimi ndaj SPAK-ut dhe drejtuesit të tij.
Ajo ka paralajmëruar se këto sulme mund të dëmtojnë seriozisht integritetin e sistemit të drejtësisë dhe ka shprehur mbështetje të fortë për punën e SPAK-ut, sidomos në luftën kundër krimit dhe korrupsionit.
Në përfundim, KLP ka ftuar median të mbështesë institucionet e drejtësisë dhe ka theksuar rëndësinë e një drejtësie të pavarur dhe transparente për forcimin e besimit të publikut dhe ndërtimin e një sistemi që mbështet dhe mbron qytetarët.
