Gjermania cilësohet si “vendi më i sigurtë dhe më stabil në Europë, dhe i dyti në botë”, bazuar në menaxhimin e krizës, pasi në vendin e parë në botë është Izraeli, që ka përvojë të gjerë me krizat dhe pastaj vijnë Zvicra e Austria.
Së fundmi, Deutsche Welle i ka kushtuar një artikull pikërisht mënyrës se si shteti gjerman po e menaxhon pandeminë dhe ka një shkallë shumë të vogël të vdekshmërisë.
Sipas presitigjiozes gjermane, qeveria vendase bazohet në modele për të marrë vendime dhe kancelarja Angela Merkel shpjegoi për mediat se hapësira që ka qeveria për t’i lehtësuar masat është ende e vogël.
Aktualisht, shkalla e riprodhimit të virusit, pra numri i njerëzve që infekton 1 njeri është afërsisht 1 person (sot 0,7) dhe po të rritet kjo shkallë në 1,1, të gjithë shtretërit e reanimacionit në Gjermani do të zihen në muajin tetor.
Nëse ndër pesë veta, një njeri, fillon të infektojë 2 vetë të tjerë, kurse të tjerët infektojnë vetëm 1 person tjetër, pra nëse shkalla e riprodhimit nuk është më 1, por 1,2, kapacitet e sistemit shëndetësor gjerman arrihen në korrik.
Ndërsa skenari i dytë parashikon disa valë të epidemisë së virusit:
- Vala e dytë e infektimeve parashikohet në vjeshtë të këtij viti.
- E treta në pranverë të vitit të ardhshëm dhe e katërta në vjeshtë 2021. Vetëm atëherë do të arrihet infektimi i plotë i popullatës, pra do të infektohen 60-70 përqind e saj. Pra edhe do të ketë edhe antitrupa kundër virusit tek njerëzit.
Gjermania e gatshme për më shumë pacientë të huaj
Këtë të premte ministri i Shëndetësisë i Gjermanisë, Jens Spahn deklaroi se përhapja e virusit në Gjermani është bërë e menaxhueshme çka do i japë mundësi shtetit gjerman që t’i ndihmojë më shumë shtetet e tjera për përballimin e virusit.
Deri tani për kurim në reanimacion në Gjermani janë shtuar 220 pacientë të huaj me koronavirus mbi 130 pacientë nga Franca, 50 nga Italia dhe 50 nga Holanda.
Vlerësimi i botës për Gjermaninë në këtë pandemi bazohet në disa faktorë:
Së pari, në nivelin e përgatitjes paraprake dhe të pajisjes së sistemit shëndetësor gjerman: numri gjithsesi i shtretërve të kujdesit intensiv para epidemies ishte 28.000 shtretër dhe u rrit aktualisht në 40.000.
30.000 nga këta shtretër kanë aparate respiratore.
10.000 shtretër të kujdesit intensiv janë ende bos dhe Gjermania i vë tani ato në dispozicion të pacientëve nga shtetet e tjera, duke ruajtur një rezervë prej 25-30 përqind.
Së dyti, faktor i rëndësishëm ndihmues në këtë krizë të virusit është numri i madh i spitaleve në Gjermani: 1400 spitale janë të shtrira në të gjithë Gjermaninë.
Refuzimi i autoriteteve për ta përgjysmuar në 600 numrin e spitaleve, siç kishte propozuar Fondacioni Bertelsmann, për të rritur më tej cilësinë e shërbimit, tani rezultoi fatlum.
Së treti, suksesi i Gjermanisë në këtë krizë bazohet në strategjinë e testimit në masë të popullatës dhe në veçimin pastaj të të infektuarve nga grupmoshat në rrezik.
160.000 teste në javë kryheshin që në fillim të epidemisë në Gjermani, 350.000 teste në javë kryhen sot (kapaciteti është për 700.000 teste në javë, deklaroi të premten ministri Spahn).
Për çdo 100 mijë banorë, Gjermania teston mbi 2079 vetë.
Së katërit, në këtë pandemi për çdo shtet luan rol edhe rastësia, pasi të infektuarit e parë në Gjermani ishin kryesisht të moshave më të reja, të cilat e përballojnë virusin më lehtë.
Izolimi i tyre pas testimeve nga grupmoshat më të mëdha, të rrezikuara më fort, e frenoi numrin e viktimave.
