Suel Çela, i kërkuar prej një viti nga SPAK pasi akuzohet për porositjen e atentatit ndaj një biznesmeni në liqenin Artificial në Tiranë por edhe për eliminimin e një tregtari në Elbasan, ka bërë rekurs vendimit të GJKKO që i ka dhënë mësën e arrestit me burg.
Nga arratia, Çela i cili njihet edhe me emrin Marjus Lulaj nuk pajtohjet me masën e sigurisë. Ai kërkon ndryshimin e masës së sigurisë nga ‘arrest me burg’ me një masë më të lehtë sigurie.
Suel Çela është një nga më të kërkuarit e drejtësisë shqiptare, ndaj të cilit ka një urdhër arresti lëshuar nga GJKKO me kërkesë të SPAK në kuadër të operacionit “Plumbi i Artë”. Sipas pretendimeve të bashkëpunëtorit të drejtësisë Nuredin Dumani, Suel Çela ka porositur atentatin e 29 marsit 2022 ndaj Elton Kilës, porosi të cilën e mori përsipër ta rezalizonte vetë Dumani. Por sipas këtij të fundit, plani dështoi pasi në Papër të Elbasanit, ra pre e një atentati ku mbeti i plagosur, dhe që pas disa orësh u lokalizua dhe iu vendosën pranga nga policia në qytetin e Fierit. Dumani rrëfen se edhe atentati ndaj Lulzim Mashës, pronar i një shkolle private në Tiranë, është porositur nga Çela, ndërsa Skerdi Tase do të ishte ekzekutori, por ky i fundit nuk e arriti dot objektivin. Elbasanlliu i shumëkërkuar, rezulton i dënuar në Itali për trafikim narkotikësh, por që ka arritur t’i shpëtojë burgut. Ai njihet edhe për episodin e një operacioni pranë tregut ushqimor në Elbasan, në pronësi të të atit, ku pati incidente. Audi i blinduar që goditi makinën e policisë sipas bluve të Elbasanit, drejtohej nga Suel Çela, por ndryshe arsyetoi gjykata e të njëjtit qytet në vitin 2019, e cila e shpalli të pafajshëm. Edhe pse Prokuroria kërkoi 7 vite burg, gjykata tha se për Suel Çelën nuk kishte prova, por dënoi shokun e tij si autor të ngjarjes.
