Në javën që sapo lamë pas u mbyll gjysma e këtij edicioni të Kategorisë Superiore. Gjatë ditës së sotme Federata Shqiptare e Futbollit ka publikuar një analizë pas këtyre 18 raundeve, duke zbardhur dhe mesataren e goditjeve të nisura drejt portës kundërshtare dhe atyre të pësuara në portën përkatëse.
RAPORTI I FSHF
Pas 18 javësh të luajtura në Kategorinë Superiore skuadrat shqiptare janë konfiguruar tashmë plotësisht, ndonëse ka mbetur ende edhe gjysma e ndeshjeve për të përfunduar garën.
Ky është gjithashtu një moment i rëndësishëm për të krijuar një ide të qartë për fizionominë e lojës, sepse të gjitha skuadrat kanë luajtur nga dy herë me çdo kundërshtar dhe mund të kenë krijuar tashmë një ide mbi vlerat e skuadrave, edhe nëse inercia e ndeshjeve të fundit, të bën të mendosh për surpriza të mundshme në terma afatgjatë.
Skuadra që ka gjuajtur më shumë herë drejt portës kundërshtare është pikërisht Bylis, e ndjekur nga Kukësi dhe Vllaznia. Mirëpo, skuadra shkodrane është ajo që pëson më pak gjuajtje drejt portës, ndërsa Apolonia është skuadra që pëson më shumë goditje.
Po të marrim në kompleks statistikat, vëmë re se diferenca mes gjuajtjeve në portë të pësuara dhe atyre te realizuar mesatarisht për 90 minuta, shpërblen pikërisht Vllazninë, që është e para në këtë klasifikim të veçantë, ndërkohë që ndëshkon rëndë Apoloninë, Skënderbeun dhe Kastriotin, që është edhe skuadra që gjuan më pak në portë në këtë kampionat.
