Ministrja e Shëndetësisë Ogerta Manastirliu ka reaguar ditën e sotme me një postim në rrjetin e saj social “Facebook”, ku ka ndarë një video gjatë inspektimit të spitalit COVID-4 në aksin Tiranë-Durrës. Ajo ka treguar se po bëhen përgatitjet e fundit në këtë strukturë spitalore dhe është gati për të pritur pacientë të infektuar me koronavirus, nëse numri i rasteve vijon të rritet.
Sipas saj, Spitali COVID-4 ka një kapacitet prej 103 shtretërish ku janë të vendosura dhe pajisjet e oksigjenit.
Ministrja Manastirliu bën me dije se aktualisht nga pacientët e shtruar në dy spitalet e tjera COVID, të paktën 95% e tyre janë të pavaksinuar.
“Po bëhen përgatitjet e fundit për ta pasur në dispozicion spitalin COVID-4 krahas dy spitaleve të tjera aktuale. Kemi më shumë se 270 shtretër në COVID 2 dhe COVID 3 ndërsa këtu janë mbi 103 shtretër dhe ka të gjitha pajisjet. Kjo është salla e terapisë intensive për pacientët që kanë nevojë për trajtim më të specializuar ndërkohë në katet e tjera janë shtretërit që janë të pajisur tashmë me oksigjen. Kjo është sfidë për QSUT-në pasi të menaxhosh jashtë territorit është e vështirë.
Futja në forcë e 150 punonjësve të rinj, lehtëson punën për t’u bërë më me efikasitet. Kapacitetet tona deri më sot i përballojnë pacientët aktualë, ndërkohë janë 95% e të shtruarve janë të pavaksinuar. Rastet në spitale që janë të vaksinuar me të dyja dozat, virusi nuk është agresiv. Duhet që të vijojmë në këto ritme të organizimit edhe përsa i përket mjekëve tanë. Qytetarët janë shumë herë më të relaksuar për shkak të vaksinës. Ne si shëndetësi jemi të përgatitur për çdo skenar” – tha Manastirliu.
