Ministrja Elisa Spiropali ka qenë e ftuar ditën e sotme në emisionin “Top Talk”, ka zbuluar disa detaje mbi ftesën që kryeministri Edi Rama i ka bërë opozitës, por nuk ka lënë pa komentuar edhe zhvillimet e fundit që po ndodhin në selinë blu.
Kujtojmë se Partia Demokratike është në prag të procesit të zgjedhjes së kryetarit, por për Spiropalin duket se nuk do të ketë ndonjë surprizë, pasi sipas saj do të zgjidhet sërish Lulzim Basha. Spiropali e lidh fitoren e Bashës me zgjedhjet e mëparshme në partinë më të madhe të opozitës.
“Nuk kemi asnjë tabu mbi këtë temë, nuk kemi asnjë skemë. Skemën duhet ta vendosim bashkërisht në një tryezë. Kryeministri e ka deklaruar nuk kemi asnjë problem as me propozimin e tyre. Jemi të gatshëm të ulemi të diskutojmë me të gjithë mundësitë, përfshirë edhe propozimin edhe nga PD-ja për presidentin. Do të ishte proces shumë shërues në procesin tonë toksik në politikën shqiptare”, tha Spiropali.
Ajo theksoi se pas vendimit të Parlamentit për shkarkimin e Metës duhet të pritet vendimi i Gjykatës Kushtetuese dhe se PS dhe PD duhen të ulen në një tryezë për zgjedhjen e presidentit, kjo nëse gjykata e quan të drejtë vendimin e Parlamentit për largimin e Metës.
Vetë kryeministri Edi Rama i ka kërkuar kryedemokratit Lulzim Basha bashkëpunim pas zgjedhjeve të 25 prillit. Në daljet e tij publike si dhe në intervista të ndryshme, Rama është shprehur se kushti është që Basha duhet të ndahet nga Sali Berisha e Ilir Meta. Kreu i PD e ka refuzuar teksa ka thënë se kryesocialisti nuk do ta ketë shansin që të bashkëqeverisë me të.
