Organizatat që monitoruan zgjedhjet e 11 majit organizuan të enjten një tryezë diskutimi me pjesëmarrjen e institucioneve dhe përfaqësuesve të partive politike.Në këtë aktivitet mori pjesë edhe kreu i SPAK, Altin Dumani, i cili prezantoi bilancin e punës së Prokurorisë së Posaçme lidhur me krimet zgjedhore.
Dumani bëri të ditur se janë administruar gjithsej 192 materiale që lidhen me dyshime për shkelje penale gjatë procesit zgjedhor.
Nga këto, 43 janë regjistruar si procedime penale dhe kanë kaluar në fazën e hetimit, ndërsa për 40 raste është vendosur mosfillimi i hetimit për shkak të mungesës së elementeve të veprës penale.
Sipas kreut të SPAK, 40 materiale të tjera janë përcjellë për kompetencë tek prokuroritë e juridiksioneve përkatëse, 22 ndodhen ende në proces verifikimi nga policia, ndërsa 17 janë bashkuar me dosje ekzistuese.
Shumica e këtyre procedimeve, sipas Dumanit, kanë të bëjnë me korrupsionin zgjedhor:
35 raste për korrupsion aktiv gjatë zgjedhjeve,
4 raste për korrupsion aktiv dhe pasiv,
1 rast për përdorim të funksionit publik për qëllime private,
1 rast për shpërdorim detyre,
dhe 1 tjetër për kanosje apo dhunë ndaj pjesëmarrësve në zgjedhje.
Dumani njoftoi se hetimet janë ende aktive, me ekzekutimin e 20 urdhrave gjyqësorë për kontrolle në banesa, zyra dhe ambiente të tjera, si dhe sekuestrimin e dokumenteve e provave të rëndësishme.
Ai theksoi gjithashtu se kallëzimet e partive politike shpesh kanë qenë të paplota dhe jo të sakta.
“Kemi komunikuar me përfaqësuesit e tyre dhe kemi trajtuar rastet në kohë të shpejtë, bazuar në analiza të detajuara të provave dhe dokumentacionit përkatës,” tha ai.
Në fund, Dumani sqaroi se nga 43 rastet për të cilat është vendosur mosfillimi i hetimit, vetëm tre janë ankimuar dhe në të treja rastet Gjykata e Posaçme ka lënë në fuqi vendimin e SPAK.
