Mjekut të QSUT Edvin Priftit i është gjetur nga policia një bllok shënimesh me disa emra të shënuar, ku dyshohet se janë pacientët të cilëve u merrte lekët.
Mësohet se blloku me listën e emrave është gjetur gjatë gjatë kontrolleve të Policisë në banesën e mjekut Edvin Prifti. Në këtë bllok variojnë shuma të shënuara që shkonin nga 1 mijë deri në 10 mijë, por nuk dihet nëse bëhet fjalë për lekë apo euro. Hetuesit kanë sekuestruar kartelat mjekësore dhe kanë nisur që të verifikojnë nëse përputhen emrat dhe datat.
Nga organi i akuzës nuk ka ende një informacion në lidhje me materialet e sekuestruara në banesën e mjekut Ndaj mjekut Edvin Prifti, Gjykata kundër Korrupsionit dhe Krimit të Organizuar vendosi masën ‘Arrest në burg’.
Pak muaj para arrestimit me akuzën e korrupsionit dhe pastrimit të parave, shefi i Kardiologjisë në QSUT, Edvin Prifti, kishte denoncuar në polici dhe prokurori kërcënime të bëra ndaj tij për shkak të detyrës.
Ai akuzonte për kanosje Leonard Selmanajn. Ky person po hetohej nga prokuroria e Tiranës pasi përmes mesazheve e telefonatave i kërkonte Edvin Priftit kthimin e një shume monetare që pretendonte se i kishte dhënë për operimin në zemër të një të afërmi.
Pas arrestimit të mjekut kardiokirurg Edvin Prifti, denoncime të tjera për të janë dërguar në Prokurorinë e Posaçme, e njohur ndryshe si SPAK. Qytetarë, ish-pacientë të tij, pretendojnë se i kanë ofruar para mjekun për të marrë shërbimin prej tij në ambientet e QSUT-së.
