Për herë të parë që nga themelimi i tij, SPAK ka një bashkëpunëtor drejtësie që ka pranuar të dëshmojë për korrupsionin në nivelet më të larta të pushtetit.
Burime nga hetimi bëjnë me dije se një nga personat më të afërt me Ajola Xoxën, bashkëshorten e kryebashkiakut të Tiranës, Erion Veliaj, ka pranuar të rrëfejë skemën e dyshuar të korrupsionit dhe pastrimit të parave në këmbim të statusit të të penduarës.
Bëhet fjalë për Adela Kondakçiun, e konsideruar si “truri financiar” i Xoxës, e cila ka dorëzuar në SPAK dokumentacion dhe prova të detajuara kundër çiftit.
Edhe pse vetë është e pandehur në këtë çështje, statusi i bashkëpunëtores së drejtësisë i jep mundësinë të përfitojë nga lehtësimi i dënimit sipas ligjit.
Dosja që po hetohet nga Prokuroria e Posaçme përmban dëshmitë e 97 personave, kontrata, bilance financiare dhe komunikime të përftuara nga pajisje të sekuestruara. Të gjitha këto pritet të përdoren për të mbështetur akuzat ndaj Erion Veliajt, Ajola Xoxës dhe personave të tjerë të përfshirë në çështje.
Arjola Xoxa
Sipas hetimeve të SPAK, Xoxa është një ndër personat e dyshuar për përfshirje në skema të dyshuara abuzive me fondet publike.
Prokuroria bën me dije se bashkë me bashkëshortin e saj, Erion Veliaj, ajo ka marrë pjesë në ngritjen dhe funksionimin e një mekanizmi të strukturuar për përfitime të parregullta financiare, përmes përdorimit të fondeve publike të Bashkisë së Tiranës në mënyrë të fshehtë dhe të paligjshme, me synim pasurimin personal dhe familjar.
Fillimisht, ndaj Xoxës ishte vendosur masa e sigurisë “arrest në shtëpi”, por pas vlerësimit nga Gjykata e Posaçme, kjo masë u zbut në “detyrim paraqitje”.
Ndaj saj rëndojnë disa akuza të rënda: “Korrupsion pasiv i funksionarëve të lartë shtetërorë ose të zgjedhurve vendorë”, kryer në bashkëpunim (në 9 raste), “Pastrimi i produkteve të veprës penale ose veprimtarisë kriminale”, si dhe “Mosdeklarimi apo deklarimi i rremë i pasurisë dhe interesave private”, sipas ligjit për personat që kanë detyrimin ligjor të deklarimit.
