SPAK ka lëshuar urdhër-arrest për ish kreun e bashkisë së Durrësit Vangjush Dako dhe ka informacione se ai është vetë dorëzuar në polici. Burime bëjnë më dije se SPAK ka nisur një operacion policor në Durrës ku janë lëshuar 10 urdhër-arreste për ish zyrtarë të kësaj bashkie.
Nga informacionet e deritanishme mësohet se këto zyrtarë akuzohen për korrupsion dhe falsifikim dokumentesh. Këto janë informacione paraprake dhe pritet që SPAK të dalë më një deklaratë zyrtare. Operacioni është ende në vijim dhe nuk dihen emrat dhe çfarë detyrash kanë mbajtur personat në fjalë.
Në operacion përveç forcave operacionale, janë edhe agjentë të Byrosë Kombëtare të Hetimit. Hetimet kanë nisur një vit më parë nga prokuroria e posaçme.
Ish-kryebashkiaku i Durrësit u mor në pyetje nga SPAK edhe në datën 17 mars 2023. Bëhet fjalë për një ndërtim që ka pësuar dëmtime të rënda nga tërmeti. Por pavarësisht kësaj Dako ka dhënë leje dhe ndërtesa është legalizuar në kundërshtim me ligjin. Dako është pyetur në cilësinë e personit që ka dijeni për rrethanat e hetimit.
Më herët Prokuroria e Krimeve të rënda ka verifikuar rolin e Dakos në dosjen që mban numrin 339, por asnjëherë nuk është ngritur akuzë ndaj tij. Kujtojmë se Dako është shpallur non-grata nga SHBA-të dhe i është ndaluar hyrja në këtë vend për korrupsion.
