Koloneli është pas hekurave, por ushtria e tij vazhdon luftën. Një muaj pas arrestimit të Erion Veliajt, perandoria e tij korruptive nuk është shembur – është thjesht riorganizuar. Pesë biznesmenët kryesorë të skemës së tij jo vetëm që shëtisin të lirë nëpër Tiranë, por vazhdojnë të manipulojnë media, të kontrollojnë tendera dhe të mbrojnë padronin e tyre të burgosur.
Fatmir Bektashi, Shkëlqim Fusha, Gentian Sula, Sokol Kryeziu dhe Meriman Palushi – të gjithë të thirrur në SPAK, të gjithë të lirë me “detyrim paraqitje”. Një masë sigurie që në praktikë do të thotë: vazhdoni punën tuaj, thjesht nënshkruani një letër çdo javë. Vetëm Elman Abule qëndron pas hekurave, ndërsa të tjerët janë të lirë të fshijnë gjurmët, të ndikojnë dëshmitarët dhe të vazhdojnë të kontrollojnë bizneset e tyre multi-milionëshe.
Këta biznesmenë nuk janë thjesht partnerë biznesi të Veliajt, por bashkëautorë të një skeme komplekse korruptive që shtrihet nga tendera të fryrë deri tek pastrimi i parave. Në zemër të kësaj skeme qëndron “Gogel” e Arbi Veliajt, vëllait të kryebashkiakut të arrestuar, dhe “AVA Studio”, formalisht në pronësi të Valbona Xoxës, nënës së Ajola Xoxës, bashkëshortes së Veliajt. Kjo kompani ka shërbyer si një makineri për të prodhuar reklama, spote dhe video për projektet e tyre të dyshimta, duke krijuar kështu një rrjet të sofistikuar për qarkullimin e parave.
Dokumente të zbuluara tregojnë transferta prej 7,468,692 lekësh nga “Gogel” tek “AVA Studio” – një kompani që ekziston vetëm në letra. Kontrollet në terren kanë zbuluar se adresa e “AVA Studio” është thjesht një apartament i thjeshtë, pa pajisje, pa punonjës, pa aktivitet real. Megjithatë, kjo nuk e ka penguar kompaninë-fantazmë të lëshojë fatura 36,000 euro me përshkrimin surreal “faturim sipas kontratës” – një eufemizëm transparent për pastrim parash.
Por si vazhdon të mbrojë emrin e Veliajt një pjesë e mediave pavarësisht provave dërrmuese kundër tij? A janë pikërisht këta biznesmenë të lënë të lirë që vazhdojnë të hedhin para për të mbrojtur kolonelin e tyre të burgosur?
Mos janë fondet ende të pasekuestruara të Veliajt që vazhdojnë të qarkullojnë në tregun mediatik? Apo ndoshta është krimi i organizuar, që tradicionalisht ka qenë në simbiozë me këto struktura korruptive?
Seanca e ardhshme në Apelin e Posaçëm më 11 mars do të shqyrtojë ankimet e Veliajt dhe katër biznesmenëve për ndryshimin e masave të sigurisë. Por deri atëherë, këta biznesmenë vazhdojnë të jenë të lirë për të manipuluar prova, për të ndikuar dëshmitarë dhe për të vazhduar aktivitetet e tyre korruptive.
Heshtja e prokurorisë përballë kësaj situate është shqetësuese. Si mundet që bashkëpunëtorët kryesorë në një skemë korruptive miliona-euroshe të trajtohen me kaq butësi? A është kjo një shenjë e presioneve të padukshme që ushtrohen mbi sistemin e drejtësisë?
Liria e biznesmenëve u jep mundësinë të vazhdojnë të financojnë media, të menaxhojnë asete të fshehura, të ndihmojnë Veliajn nga jashtë, dhe më e rëndësishmja – të vazhdojnë të bëjnë pazare të reja, të sigurojnë koncesione dhe të manipulojnë tendera të tjerë.
Ndërsa Prokuroria hesht, këta oligarkë vazhdojnë të përdorin lirinë e tyre për të forcuar dhe zgjeruar perandorinë e korrupsionit që kanë ndërtuar. Sepse në Shqipëri, duket se korrupsioni i organizuar vazhdon të jetë më i fortë se ligji!
/gazetareforma.com
