Prokuroria e Posaçme kundër Korrupsionit dhe Krimit të Organizuar ka paraqitur zyrtarisht kërkesë në Kuvendin e Republikës së Shqipërisë për dhënien e autorizimit për arrestimin ose heqjen e lirisë së zëvendëskryeministres dhe ministres Belinda Balluku.
Në orën 15:00, SPAK bëri të ditur se kërkesa i është drejtuar Kuvendit në kuadër të procedimit penal nr. 136 të vitit 2025. Sipas Prokurorisë së Posaçme, Balluku akuzohet për veprën penale “shkelja e barazisë së pjesëmarrësve në tendera apo ankande publike”, e kryer në bashkëpunim, në lidhje me procedurën e prokurimit me objekt “Ndërtimi i tunelit të Llogarasë”.
SPAK njofton se Belinda Balluku është marrë në cilësinë e të pandehurit për këtë procedurë konkrete, ndërsa paralelisht ajo po hetohet edhe për dyshimin e kryerjes së së njëjtës vepër penale në shtatë procedura të tjera prokurimi publik. Këto procedura kanë si objekt:
“Plotësimi, rakordimi dhe vazhdimi i punimeve Sheshi Shqiponja-Lumi i Tiranës, Loti 1 dhe QMT”
“Ndërtimi i segmentit rrugor Sheshi Shqiponja-Bulevardi i Ri, Loti 2”
“Ndërtim i segmentit rrugor Sheshi Shqiponja-Bulevardi i Ri-Shkozë, Urat mbi lumin Tirana”
“Ndërtimi i Unazës së Jashtme Tiranë, Loti 4”
“Ndërtim i Unazës së Jashtme Tiranë, Loti 5”
“Ndërtim i Unazës së Jashtme Tiranë, Loti 6”
“Ndërtim i Unazës së Jashtme Tiranë, Loti 7”.
Në njoftimin zyrtar, SPAK thekson se kërkesa për heqjen e imunitetit mbështetet në nenet 73, 95 dhe 103 të Kushtetutës së Republikës së Shqipërisë, nenin 288 të Kodit të Procedurës Penale, si dhe nenet 13 dhe 118 të Rregullores së Kuvendit.
Sipas Prokurorisë së Posaçme, qëllimi i kësaj kërkese është marrja e autorizimit nga Kuvendi për procedimin e mëtejshëm ligjor ndaj Belinda Ballukut, e cila ushtron njëkohësisht funksionet e deputetes, ministres dhe zëvendëskryeministres së Republikës së Shqipërisë.
Në përfundim, SPAK sqaron se çdo person prezumohet i pafajshëm derisa fajësia e tij të provohet me vendim gjyqësor të formës së prerë.
